Héraðssamband Þingeyinga

Veðrið er verulega að stríða okkur þennan veturinn - því nú þarf Frjálsíþróttaráð HSÞ að fresta sínum aðalfundi aftur.  Fundurinn átti að vera í kvöld á Grænatorgi, en er frestað um óákveðinn tíma.

Verður auglýst þegar að þriðju tilraun kemur. 

Frjálsíþróttaskóli UMFÍ

Frjálsíþróttaskólinn var haldinn dagana 11.-15. júní á Laugu, í annað sinn á vegum Frjálsíþróttaráðs HSÞ.  Af starfssvæði HSÞ tóku þátt alls 15 krakkar á aldrinum 11 - 14 ára.  Þetta var flottur hópur krakka og gekk allt mjög vel.  Frjálsíþróttaæfingar voru tvisvar á dag auk þess sem farið var í sund, fótbolta, útileiki og fleira.  Þjálfarar voru Brói, Selmdís og Andri Hnikarr - en foreldrar skiptust á að sjá um matarundirbúning og viðveru.  Síðasta kvöldið var farið á pizzahlaðborð í Dalakofann.  Veðrið lék við hópinn, sólríkt og þurrt en stundum aðeins kalt þegar líða tók á kvöldið.  

Sumarleikar HSÞ 2012

Sumarleikarnir voru haldnir á Laugum helgina 23. og 24. júní.  Leikarnir tókust vel og veðrið var með ágætum - sól og gola fyrri daginn en sólarlítið seinni daginn. Dagskráin var að mestu á áætlun og allir lögðu sitt af mörkum til að gera þetta að skemmtilegu móti.  Margir nýttu sér aðstöðuna og gistu á tjaldsvæðinu á Laugum. Í tengslum við Sumarleikana var á laugardagskveldinu í fyrsta sinn keppt í héraðsmóti í stafsetningu og upplestri.  Tilefnið var að á næsta Unglingalandsmóti verður keppt í þessum sömu starfsgreinum.

Á leikunum tóku þátt 136 keppendur frá 7 félögum;  35 frá HSÞ, 41 frá UFA, 17 frá UMSE, 28 frá UMSS, 12 frá ÚÍA og 1 Ármanni og 1 ÍR.  Keppendur okkar hjá HSÞ stóðu sig með mikilli prýði, og tóku fleiri yngri og óreyndari keppendur þátt en oft áður og stóðu sig vel.  Margir bættu árangur sinn en enginn héraðsmet féllu að þessu sinni.  Í hlut keppenda HSÞ komu 21 gull, 22 silfur og 18  brons. Vel af sér vikið.

Við þökkum öllum sem mættu á Lauga fyrir góða helgi, og sérstaklega þökkum við þátttakendum fyrir drengilega keppni og sjálfboðaliðum fyrir vel unnin störf, án þeirra gengur þetta ekki.

Frjálsíþróttaráð HSÞ

HSÞ þakkar ÖLLUM sem lögðu sitt af mörkum - þátttakendum, þjálfurum, sjálfboðaliðum og foreldrum.

Sumarleikar HSÞ í frjálsum íþróttum verða haldnir á Laugavelli dagana 23 og 24.júní 2012.
Skráning keppenda fer fram á fri.is mótaforrit og lýkur skráningu á fimmtudagskvöldið 21.júní.
Eftir það er aðeins hægt að senda skráningar í tölvupósti á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.
og kostar hver skráning 1000.- svo vinsamlegast komið ÖLLUM skráningum í tæka tíð.

Frí tjaldstæði við hliðina á vellinum og svo er frítt í sund fyrir 15 ára og yngri.
Sjoppa á staðnum. Frítt í Bíó seinnipartinn á laugardag.

SJÁ NÁNAR um keppnisgreinar og skráningagjöld:  

Dagana 11. - 15. júní í sumar verður Frjálsíþróttaskóli UMFÍ haldinn á Laugum í Reykjadal.

Frjálsíþróttaskóli UMFÍ er ætlaður ungmennum á aldrinum 11 – 18 ára.  Skólinn er kjörið tækifæri til að efla sig í frjálsum íþróttum og kynnast öðrum ungmennum.  Auk íþróttaæfinga verða ýmsar óvæntar uppákomur, kvöldvökur, gönguferðir og fleira skemmtilegt.  Skólinn hefst á mánudegi og lýkur á föstudegi.

Innifalið í verði, kr. 17.000, er; gisting matur og kennsla.

Nánari upplýsingar og skráning:  http://umfi.is/umfi09/veftre/verkefni/ithrottir/frjalsithrottaskoli/frjalsithrottaskoli_umfi_2012/

Endilega skráið ykkur tímanlega og helst ekki síðar en 6. júní n.k.

Sjáumst vonandi sem flest á Laugum,

Frjálsíþróttaráð HSÞ

Kæru félagar í HSÞ !

Fyrsti aðalfundur frjálsíþróttaráðs HSÞ verður haldinn á morgun, fimmtudaginn 26. apríl, á Grænatorgi í íþróttahöllinni á Húsavík og hefst fundurinn kl: 20:00.

HSÞ hvetur þau aðildarfélög, sem hafa frjálsíþróttir á sínum verkefnalista,  til þess að senda sína réttkjörnu fulltrúa á aðalfundinn.  Annars mega einnig mæta þeir sem hafa brennandi áhuga og vilja hafa áhrif til þess að efla frjálsíþróttastarfið í héraðinu.

Hafdís Sigurðardóttir var valin frjálsíþróttamaður HSÞ og íþróttamaður HSÞ fyrir árið 2011. Þar sem hún var fjarri góðu gamni á ársþingi HSÞ s.l. sunnudag, þá voru henni voru afhentir bikarar og blóm á frjálsíþróttaæfingu í Stórutjarnaskóla af Birnu Davíðsdóttur stjórnarmanni HSÞ.
Hafdís er ekki bara sjálf að æfa af kappi, heldur þjálfar hún einnig góðan hóp í frjálsum íþróttum, börn á aldrinum 6-14 ára einu sinni í viku í Stórutjarnarskóla. Hún þakkaði vel fyrir sig þegar hún tók við viðurkenningunum og bað fyrir kveðju til ALLRA.  Krakkarnir fögnuðu vel og innilega og klöppuðu mikið fyrir henni. Þau skoðuðu bikarana í krók og kring og fengu að prófa að lyfta bikar. Skemmtileg stund og án efa hvetjandi fyrir framtíðar íþróttastjörnur.
Hafdís er flott fyrirmynd.

 

Meistaramót Ísland fór fram helgina 22. - 24. júlí í sumar.  Hafdís Sigurðardóttir keppti fyrir hönd HSÞ og stóð sig verulega vel og er Héraðssambandinu til mikils sóma.  Hafdís sigraði þrefalt; í 100m og 200m hlaupi og einnig í langstökki.   Ekki skal það því koma okkur á óvart að Hafdís var með besta afrek mótsins í kvennaflokki, en hún hljóp 100m hlaupið á 11,96 sek., sem gefa 1020 stig.  Í karlaflokki var það Kristinn Torfason í FH sem fékk flest stig fyrir 7.82m í langstökki. Því miður fæst þessi góði árangur þó ekki viðurkenndur, þar sem meðvindur mældist of mikill.

Annars var það lið FH sem sigraði nokkuð örugglega í stigakeppni Meistaramótsins, en liðið sigraði bæði stigakeppni í karla- og kvennaflokki. FH-ingar hlutu samtals 34.634 stig. ÍR sem varð í öðru sæti hlaut samtals 23.969 stig, en lið HSK/Umf. Selfoss varð í þriðja sæti með 20.129 stig.

 

Sumarleikar HSÞ 2011, sem haldnir verða 2. og 3. júlí á Laugum í Reykjadal, er stærsta frjálsíþróttamót sem haldið er á vegum HSÞ í sumar og getur verið hin besta fjölskylduskemmtun.  Keppt er í fjölda greina í öllum aldursflokkum, en dagskrá mótsins má sjá á www.fri.is

 

Allar nánari upplýsingar á heimasíðu Frjálsíþróttaráðs HSÞ  123.is/hsth.

Hafdís Sigurðardóttir félagi okkar í HSÞ var í landsliði Íslands sem keppti á Smáþjóðaleikum í Lichtenstein á dögunum. Þar keppti hún í 100 m hlaupi og langstökki. Hún bætti sig í báðum greinunum og það skilaði henni bronsi í langstökkinu. Glæsilegt!
Sjáum hér frásögn Hafdísar af keppninni:
1. júní keppti ég í undanrásum í 100m hlaupi kvenna - var önnur í riðlinum á tímanum 12.26 sek sem hefði verið bæting, en vindurinn var aðeins of mikill eða +2.1m/s.
En þessi tími kom mér inn í úrslit í sjötta og síðasta sæti inn.
Úrslitin voru seinna um daginn í rigningu og kulda miðað við veður dagana á undan, bara ekta íslenskt veður. Hljóp úrslitin á 12.15 sek og vindur var +1.8m/s og löglegt hlaup - endaði í 6. sæti og bætti minn persónulega árangur úr 12.48 sek í 12.15sek.
Keppti aftur 3. júní í langstökki, átti frábæra stökkseríu, endaði í 3. sæti með stökk uppá 6.09m (vindur +0,6m/s), lögleg bæting.
4. júní keppti ég í 4x100m boðhlaupi, hljóp annan sprett með íslensku sveitinni og fengum við brons, hlupum á 47.09 sek en Kýpur sveitin sem var í öðru sæti var á tímanum 47.08sek!

Nú er vorið komið og okkur ekkert að vanbúnaði að færa íþróttaæfingar út í ferska loftið.
Frjálsíþróttaæfingar eru byrjaðar á Laugum og verða þær þar á mánudögum og miðvikudögum og byrja kl. 19:00.
Sameinast verður um akstur frá Húsavík samkvæmt akstursskipulagi sem dreift verður til foreldra von bráðar.
Framundan er svo sumarið með fullt af mótum.

Nánar er hægt að sjá útslitin á mótaforritinu á fri.is